Drejtori i së ashtuquajturës Zyrë për Kosovën në Qeverinë e Serbisë, Petar Petkoviq, tha se me qëllim të destabilizimit të mëtutjeshëm të situatës në terren, autoritetet në Prishtinë, të udhëhequra nga Albin Kurti, kanë nisur “procedurën për miratimin e ligjit të ri të ashtuquajtur për shpronësimin, me të cilin fjalë për fjalë duan të legalizojnë sekuestrimin e tokës serbe në veri të Kosovës dhe Metohisë dhe mbi të po ndërtojnë të ashtuquajturat bazat e tyre ushtarake dhe policore”.
Kështu thuhet në një njoftim lëshuar nga kjo zyrë.
Petar Petkoviq po ashtu tha se me ligjin e ri të përgatitur nga Kosova, në çdo objekt serb ku Kurti bën me gisht, autoritetet në Prishtinë mund të deklarojnë “interes publik” dhe të ndërtojnë baza ilegale policore dhe ushtarake për njësitë e tyre speciale në atë vend.
“Nuk ka dyshim se kjo është një përpjekje e re për të marrë tokën serbe, të cilën Prishtina po përpiqet ta legalizojë sipas ligjeve të veta për hir të arritjes së interesave të okupimit. Është e qartë se qëllimi i Prishtinës është të përdorë këtë dhunë ligjore për ta trajtuar brutalisht popullin serb, i cili qetësisht, por me vendosmëri i tha jo okupimit dhe shpronësimit”, vlerëson Petkoviq, shkruan nova.rs.