Nënkryetari i Listës Serbe Igor Simiq, i ka takuar zëvendësin e departamentit për Ballkan, Nicolas Faye, dhe ambasadorin francez në Prishtinë, Olivier Gueraud.
Simiq ka shkruar se Lista Serbe nuk kthehet në institucione pa u themeluar Asociacioni i Komunave me shumicë serbe dhe pa u tërhequr forcat e policisë nga veriu.
“…Kthimi i serbëve në institucione është i pamundur derisa të plotësohen kërkesat e popullit serb që është formimi i Asociacionit të Komunave me shumicë serbe dhe tërheqja e të gjitha njësive speciale nga veriu i Kosovës dhe Metohisë që çdo ditë keqtrajtojnë popullin serb”, ka shkruar Simiq.
Ai po ashtu ka thënë se Lista Serbe nuk i njeh zgjedhjet e jashtëzakonshme në katër komunat veriore.
“Në takim shpreha një qëndrim të qartë se të dielën janë mbajtur zgjedhje të paligjshme, jolegjitime dhe jodemokratike dhe se nuk ka arsye që përfaqësuesit ndërkombëtarë të thonë se u vjen keq sepse serbët bojkotuan, por është për keqardhje që përfaqësuesit ndërkombëtarë ishin në dijeni të të gjitha problemeve dhe nuk ndërmorën asnjë veprim për t’i zgjidhur, siç janë veprimet e Prishtinës dhe Albin Kurtit që i detyruan serbët të largohen nga institucionet e Kosovës dhe të bojkotojnë këto zgjedhje të rreme, rezultatet e të cilave nuk i njohim, janë për keqardhje”, ka shkruar Simiq në Facebook.
