Mbrojtësi Daley Blind nuk do të jetë pjesë e Bayern Munichut pas përfundimit të sezonit aktual, përcjell “Bild” të martën. Bëhet e ditur se holandezi do të largohet në verë nga Bayerni, pasi ekipi gjerman nuk e ka ndërmend ta vazhdojë bashkëpunimin me 33-vjeçarin.
Blind iu bashkua Bayernit në fillim të janarit si lojtar i lirë dhe firmosi kontratë deri në fund të sezonit me opsionin e rinovimit.
Megjithatë, te Bayerni kanë vendosur të mos ia rinovojnë kontratën për shkak se Blind nuk ka bindur me paraqitjet e tij. Ai ka regjistruar vetëm pesë paraqitje në të gjitha garat për Bayernin dhe nuk bën pjesë në planet e trajnerit Thomas Tuchel për të ardhmen.
Blind ka bërë karrierë edhe tek Ajaxi, Manchester Unitedi e Groningeni.