Albert Krasniqi, menaxher i projekteve në Demokraci Plus, ka thënë se dy komisionet hetimore për energji të Kuvendit të Kosovës nuk kanë arritur të zbardhin asgjë.
Ai përmes një postimi në Facebook ka folur për menaxhimin e sektorit të energjisë nga qeveritë e kaluara dhe e tanishmja.
“Në ndërkohë, dy komisionet hetimore për energji të Kuvendit – për një vit – nuk kanë arritur të zbardhin asgjë. As këta për ata, as ata për këta”, ka shkruar ai.
Krasniqi për të kaluarën ka përmendur çmimin e shitjes së distribucionit që sipas tij është fitimi i një viti si faljen e katër hidrocentraleve.
“Si është menaxhuar në të kaluarën me sektorin e energjisë, mjafton të përmendim çmimin e shitjes së distribucionit prej 26.3 milionë euro – që është fitimi i një viti – dhe faljen e katër hidrocentraleve”, ka thënë Krasniqi.
Ndërsa, sa i përket menaxhimit të energjisë nga qeveria aktuale ai ka përmendur emërimin e një personi politik në krye të KEK-ut, mjetet e ndara për KEDS dhe KOST, shtrenjtimin e tarifave nga ZRrE etj.
Krasniqi ka përmendur edhe rastin e ambasadorit Berisha i cili përkundër se është i dyshuar për përfshirje në skandalin në vlerë prej 100 milionë euro, ende nuk është shkarkuar. Ndërsa për drejtorin e KEK-ut i cili tash është arrestuar për keqpërdorim të detyrës zyrtare ai ka thënë se po mbrohet nga pushteti “jo pse s’ka vjedhur, por pse e kanë zënë”./teve1.info/
