Drejtori i Institutit të Kosovës për Drejtësi, Ehat Miftaraj ka folur për punën dy-vjeçare të Qeverisë Kurti sa i përket reformave në drejtësi.
Miftaraj duke folur për vetting’un ka thënë se ky proces është menaxhuar në mënyrën e duhur edhe pse me vonesa.
“Edhe përkundër faktit që kanë marrë një bekim të tillë, kanë hyrë në muajin e 25-të a 26-të të qeverisjes. Jemi në një fazë kur është dërguar amandamenti kushtetues në Gjykatën Kushtetuese, është formuar Komisioni Ad-hoc që udhëhiqet nga LDK kështu që mund të themi se është menaxhuar në mënyrën e duhur edhe pse me vonesa, sepse kanë përfshirë edhe opozitën, shoqërinë civile, edhe kanë marrë bekimin e KGJK të cilët kanë thënë se do ta pranojnë të njëjtin nëse Gjykata Kuashteutese thotë se është në frymën e Kushtetutës”, ka thënë Miftaraj.
Megjithatë sipas tij, dështimi më i madh ka qenë te Ligji për Këshillin Prokurorial, përkatëisht mënyra se si kjo ministry e ka argumentuar Ligjin në Gjykatë Kushtetuese.
“Gabimi i Ministrisë së Drejtësisë ka qenë që nuk ka ditur, nuk ka argumentuar Ligjin si duhet në Gjykatën Kushtetuese. Edhe kryeminsitri Kurti, edhe ministrja Haxhiu po krenohen që i kanë marrë dy opinione pozitive nga Komisioni i Venecias. Por të dytë nëse do ta dinin ABC-në e drejtësisë do ta kuptonin që komisioni kur jep opinione ligjore për shtete tregon praktikat, standardet ndërkombëtare por që pastaj shtetet apto opinione duhet t’i akomodojnë brenda kulturës juridike që e ka çdo shtet veç e veç. Komisioni i Venecias shumë qartë e ka treguar se anëtari i KPK-së i përfaqësuar nga Avokati i Popullit mund të funksionojë në shtete apo kultura të ndryshme, sidoqoftë është obligim i Ministrisë së Drejtësisë për ta parë nëse Avokati i Popullit, si anëtar i KPK-së e cenon Kushtetutën apo në njëfarë mënyrë e siguron pavarësinë e këtij institucioni në shumë procese të rëndësishme”, ka thënë Miftaraj në Respublika në Tëvë 1.
Sipas tij, Ministria është dashtur ta bindë ndryshe Kushtetuesen se pse duan t’ia ndërpresin mandatin disa anëtarëve të KPK-së.
“Ministria e Drejtësisë është dashur që ta bindë Gjykatën Kushtetuese se në linjë me këtë që ka thënë Komisioni i Venecias, arsyeja pse duam t’ia ndërpresim mandatin disa anëtarëve të KPK-së se në vitet e fundit i ka udhëhequr kaq procese të rekrutimit, e ka udhëhequr një proces për Kryeprokuror të Shtetit të cilin ka dështuar ta bëjë në bazë të ligjit, ka mundur të gjejë argument e argumente e jo fjalë të rrugës”.
“Po ashtu Komisioni i Venecias e ka thënë në parim se nuk pajtohen asnjëherë për t’ua ndërprerë mandatin anëtarëve të Këshillave Gjyqësorë apo Prokurorial, por pasi që shoqëria civile ka pasur takime me Venecian, i ka dërguar raporte, e ka dokumentuar gjendjen e mjerë që është në sistemin prokurorial është pajtuar se në Kosovë kemi korporatizëm brenda KPK, kemi një kulturë të pandëshkueshmërisë dhe një KPK që fatkeqësisht nuk është se i ushtron kompetencat në mënyrë të drejtë dhe të paanshme për të gjithë qytetarët”, ka shtuar Miftaraj.
