Hapin e parë drejt zbulimit të akteve korruptive të mbi 60 zyrtarëve policorë dhe doganorë, e kishte bërë Inspektorati Policor përmes një kallëzimi penal. Rreth katër muaj më vonë, Prokuroria Speciale kishte filluar me hetime që çuan në arrestimin e 50 zyrtarëve dhe shpalljen në kërkim të 18 të tjerëve.
Tarifat doganore, jo të gjithë i paguan vitin e kaluar.
“A ka ndonjë kafe për këta burra a jo?”
Në këtë formë kishte kërkuar ryshfet polici U.M, ku vlera e gjërave të përvetësuara arrinin shifrën prej 1 euro e gjysmë.
Por jo të gjithë të pandehurit kërkuan kafe për kafe.
Kështu për lejimin e transportimit të shamponëve e disa pajisjeve telefonike, sipas dosjes së Prokurorisë Speciale, që e ka siguruar Tëvë1, një polic tjetër kishte marrë 10 euro nga transportuesi.
“Për kontroll më 28.10.2021 vjen një shtetas i Shqipërisë. I pandehuri H.H e pyet atë; “Kah jeni kah shkoni, a çka jeni kah boni? A ki me pagu ti i pari? Pas kësaj shtetasi i Shqipërisë i gjuan diçka nga pjesa e jashtme e sportelit (dyshohet para) në tavolinë. I pandehuri H.H, duke i thënë “tu rritë nera”, i merr paratë prej tavolinës dhe i shtyen me shpejtësi nën tavolinë.”
E brenda një ndërrimi, B.K kishte marrë mbi 200 euro ryshfet, duke përfshirë edhe lejimin e kontrabandës së kërpudhave.
Dikush tjetër mori më shumë se kaq.
500 kilogramë substanca narkotike e llojit Canabis Sativa, kaloi doganën duke i korruptuar disa nga të pandehurit me rreth 300 euro.
“Unë valla s’kesh tu e (nuk kuptohet), pa e ngjoft hiq. Hajt burrë zullumin s’deshta me ja lshu, (nuk kuptohet) 500 killa, (nuk kuptohet) a e din. Bimë mjekësore nashta kanë vlerë najsen.”
Përpos tarifave, këta zyrtarë përmes ryshfetit, vendasve të Kosovës dhe Shqipërisë u lejuan të kalonin pa i përfillur masat anti Covid.
Disa nga zyrtarët policorë ishin dëshmitarë të kryerjes së këtyre veprave nga vartësit e tyre, por që sipas Prokurorisë nuk kishin ndërmarrë asnjë hap në parandalimin ose ndërprerjen e aktit korruptiv, duke u bërë kështu pjesë e grupit kriminal të organizuar.
E dyshimet për këto vepra penale, fillimisht Inspektorati Policor i Kosovës më 7 shkurt 2021 kishte dorëzuar kallëzim penale tek Prokuroria Speciale.
E në qershor të vitit të kaluar, Prokuroria Speciale kishte filluar hetimet, të cilat u zgjeruan katër herë.
Deri të mërkurën u arrestuan 48 zyrtarë policorë dhe 2 zyrtarë doganorë, e 18 të tjerë janë ende në kërkim nga policia.
Raporti i gazetares Florijeta Dernjani
