Analisti, Dorajet Imeri vlerëson se abstenimi i Sllovakisë dhe Greqisë në votimin e Komitetit të Ministrave të Këshillit të Europës rreth procedimit të aplikimit të Kosovës në Asamblenë Parlamentare të KiE-së, mund të jetë indikative për çështjen e njohjes së Kosovës.
Madje sipas Imerit ajo që ka ndodhur sot tregon se pranimi i Kosovës në organizata ndërkombëtare do të jetë i lidhur ekskluzivisht me fatin e bisedimeve politike Kosovë-Serbi.
“Me sa pashë në media Spanja ka votuar kundër, kurse Sllovakia dhe Greqia kanë abstenuar e që mund të jetë indikative për fazën e njohjes nëse eventualisht mund ta lidhim pastaj me procesin vijues. Është shumë interesant mënyra si është deklaruar vet trajtimi i temës së Kosovës. Ata thirren në procedura të brendshme në ndërkohë kanë përmendur Marrëveshjen e Brukselit dhe dakordimin e Ohrit. Kjo tregon që pranimi i Kosovës në organizata ndërkombëtare do të jetë i lidhur ekskluzivisht me fatin e bisedimeve politike Kosovë-Serbi”, ka thënë Imeri.
Sipas Imerit, Kosova duhet ta ngrisë si çështje faktin që Serbia po e pengon anëtarësimin e saj në mekanizma ndërkombëtarë dhe kjo është shkelje e marrëveshjes.
“Pra një organizatë ndërkombëtare, në këtë rast Këshilli i Evropës thotë se duke u bazuar në standardet e brendshme dhe marrëveshjen në mes të palëve, e njëra nga pikat ka qenë mospengimi i njëra-tjetrës për anëtarësim në organizata ndërkombëtare. Por Serbia ka votuar kundër dhe Kosova menjëherë do ta ngrisë si çështje se Serbia po e pengon anëtarësimin e saj në mekanizma ndërkombëtarë dhe kjo është shkelje e marrëveshjes”.
“Kosova duhet të jetë më e zëshme, bashkësia ndërkombëtare duhet të jetë më e vendosur, lehtësuesit e bisedimeve duhet të jenë më të prerë në atë se si po përdoren bisedimet Kosovë-Serbi”, ka shtuar ai në Ditari në Tëvë 1
