Sot, është gjetur trupi i pajetë i një personi të nacionalitetit serb, i cili dyshohet se dy ditë më parë kishte rënë në kanalin e Ibrit, në fshatin Zupq.
Lidhur me këtë rast, ministri i Punëve të Brendshme, Xhelal Sveçla, ka thënë se Policia e Kosovës në bashkëpunim me Agjencinë e Menaxhimit Emergjent kanë trajtuar me seriozitet njoftimin e zhdukjes së trupit të pajetë.
Sveçla ka bërë të ditur se hetimet do të vazhdojnë deri në zbardhjen e të gjitha rrethanave të vdekjes së tij.
“Përgëzoj pjesëtarët për profesionalizmin e treguar, falënderoj përgjegjësit e Ndërmarrjes Publike “Ibër Lepenc” për bashkëpunimin ndërsa familjes së të ndjerit i shpreh ngushëllimet e mia. Hetimet do të vazhdojnë deri në zbardhjen e të gjitha rrethanave të vdekjes së tij”, ka shkruar ai në Facebook.
Gjetja e trupit të pajetë është konfirmuar edhe nga Policia e Kosovës.
Zëvendëskomandanti i Policisë rajonale të veriut, Veton Elshani, për teve1.info ka bërë të ditur se pas rikërkimit të zhytësve të Policisë së Kosovës, është gjetur trupi i pajetë.
“Rreth orës 14:00 sot, kanë shkuar në vendin e ngjarjes, tre zhytës nga Policia e Kosovës dhe zhytës të tjerë, të cilët e kanë rifilluar kërkimin në zonën ku nuk kanë pasur mundësi të kontrollohet dje, sepse uji ka qenë i thellë dhe i shpejtë, ku pas kërkimit është gjetur trupi i pajetë i personit i cili është paraqitur i zhdukur para dy dite”, ka thënë ai.
Sipas Elshanit, dyshohet se vdekja e personit ka ndodhur aksidentalisht.
“Besohet që ka qenë aksidentalisht vdekja e tij, ka rrëshqit në kanal të ujit, ndërsa me urdhër të prokurorit trupi i tij shkon për autopsi”.
