“S’ka proces të normalizimit”. Kështu thotë deputeti i Partisë Demokratike të Kosovës, Rashit Qalaj teksa komentoi marrëveshjen e arritur në Ohër mes Kosovës dhe Serbisë.
Ai theksoi se presidenti i Serbisë, Aleksandar Vuçiq çdo ditë po deklaron se nuk do t’i implementojë disa pjesë të marrëveshjes.
“Ju po e shihni për çdo ditë, presidenti i Serbisë del publikisht dhe thotë që Serbia nuk do t’i implementojë disa pjesë të marrëveshjes. Dhe kur një president i cili ka qenë pjesë e bisedimeve për atë marrëveshje deklaron ende pa filluar implementimi, se ai nuk do t’i implementojë disa pjesë të marrëveshjes, atëherë për cilën marrëveshje ne bëjmë fjalë?!”, tha Qalaj në “Info Nata” në Tëvë 1.
Sipas deputetit të PDK-së, marrëveshja nuk i plotëson aspiratat e popullit të Kosovës, pasi siç thotë ai, në këtë marrëveshje nuk garantohet as integrimi në NATO, as integrimi në BE, si dhe as njohja nga 5 vendet jonjohëse. /Teve1.info/
