Pavarësisht që kanë lënë Ukrainën e po gjejnë strehim në Kosovë, Maria Kudyrko dhe Julia Obodovska po vazhdojnë të shikojnë lajmet se çka po ndodh atje.
Me lot në sy dhe buzë dridhur, Maria po mendon për familjarët që ka lënë në katundin e saj, pak kilometra larg kryeqytetit Kiev.
“Atje më ka mbetur burri, nëna dhe familjarët e tjerë, të cilët nuk kanë mundur të ikin për shkak të moshës dhe për shkak të mos pranimit për të lënë vendlindjen ku janë rritur mirëpo unë flas me ta deri në 5 herë në ditë e secilën herë mendoj se a mund t’ua dëgjoj zërin më”, tha Kudyrko .
Maria rrëfen se kanë qëndruar 11 ditë në ato pjesë ku po zhvillohet lufta.
Pas kalimit të asaj sfide, ajo nuk lëshon asnjëherë duart e dy fëmijëve të saj.
“Kur kemi filluar ikjen ajo pjesa ka qenë plus minus e sigurte për ne, rruga deri në Moldavi nuk ishte e gjatë mirëpo kemi pritur 12 orë për të kaluar të njëjtën, kemi pasur vazhdimisht alarme dhe sirena për shpërthimin e ndonjë rakete mirëpo për fat të mirë, bombardimi nuk ndodhi afër neve, kaluam sigurt mirëpo me shumë frikë”, shtoi ajo.
Në anën tjetër, Julia Obodovska thotë se këtë ikje e ka bërë për hir të djalit të saj.
“Rruga ishte shumë e vështirë, në mbrëmje kemi vendosur dhe në mëngjes jemi nisur me veturë,kam ikur sepse nuk dua që fëmija im të traumatizohet duke i dëgjuar sirenat dhe bombardimet e njëpasnjëshme, mirëpo këtyre ju kemi thënë se do të bëjmë një udhëtim pasi ta duan të kthehen tek shokët e tyre, mirëpo unë kam vendosur ti largoj nga ai realitet i hidhur”, tha Obodovska.
Pavarësisht se vet është larguar nga lufta, Julia thotë se mendon vazhdimisht për personat që i njeh dhe kanë mbetur atje.
“Ato banesa janë të vjetra dhe nuk janë të sigurta për ta, njerëzit nuk kishin siguri saqë kur dëgjonin alarmet dilnin jashtë në rrugë për strehim. Sa herë po flas me ta, po mendoj se a do të shihemi edhe njëherë, këtë gjë e kam menduar edhe gjatë periudhës sa jam përshëndetur, diku i shikuar shumë prej tyre të moshuar me shpresë që do ti shoh edhe njëherë”, shtoi ajo.
Maria dhe Julia janë vendosur qe tre ditë në shtëpinë e Valon Zhdrellës në Prishtinë, dhe të njëjtat gjithë këtë rrugë prej 1500 km e kanë bërë me këtë veturë.
Raporti i gazetares Fetije Kamberi.
