Presidenti i Serbisë, Aleksandër Vuçiq ështa takuar me Ambasadorin e ShBA-së në Serbi, Christopher Hill.
Vuçiq ka shkruar se ambasadorin e ka informuar për “situatën dhe sfidat gjithnjë e më të vështira” me të cilat sipas tij po përballen serbët në Kosovë.
“E takova ambasadorin Hill për të diskutuar për situatën dhe sfidat gjithnjë e më të vështira me të cilat përballet populli ynë në Kosovë dhe Metohi dhe përsërita shqetësimin tim për sulmet, arrestimet dhe presionet e tjera të shpeshta ndaj të cilave janë të ekspozuar serbët”, ka shkruar Vuçiq në Instagram.
Vuçiq ka shtuar se Serbia po e respekton marrëveshjen e arritur me Kosovën.
“Republika e Serbisë po përpiqet të ruajë paqen dhe të sigurojë një jetë më të sigurt dhe më të lehtë për të gjithë qytetarët me një politikë konsistente dhe të përgjegjshme, duke respektuar dhe zbatuar të drejtën ndërkombëtare dhe marrëveshjen e arritur në dialogun me Prishtinën, dhe i kërkova ambasadorit Hill mbështetjen e plotë dhe angazhimin e SHBA-së në këtë rrugë”, ka deklaruar ai.
