Qeveria ka miratuar projektligjin për ratifikimin e Marrëveshjes Financiare për programin IPA 2022.
Kryeministri Albin Kurti ka thënë fillimisht se qëllimi i këtij projektligji është krijimi i bazës ligjore për të filluar zbatimin e projekteve që përfshihen në kuadër të këtij programi.
“Qëllimi i kësaj marrëveshjeje është të krijohet baza e nevojshme ligjore për të mundësuar fillimin e zbatimit të projekteve që oërfshihen në kuadër të programit vjetor IPA 2022. Pasi kemi zhvilluar proceurat e nevojshme deri në marrjen e autorizimit për nënshkrim, përfundimisht kemi nënshkruar marrëveshjen me 24 mars 2023 dhe tani kërkohet miratimi i projektligjit për ratifikimin e saj”, ka thënë Kurti.
Sipas tij marrëveshja i mundëson Kosovës të përfitojë mbi 62 milionë euro nga BE-ja.
Ndërsa kombinuar me bashkëfinancimin nga Kosova dhe partnerët tjerë, mundësohet zbatimi i projekteve që kalojnë vlerën e 90 milionë eurove.
“Ratifikimi dhe hyrja në fuqi e kësaj marrëveshjeje i mundëson Kosovës të përfitojë 62.25 milionë euro nga BE. Projektet që do të zbatohen janë për kthim dhe riintegrim të komuniteteve, përkrahje për mjedis dhe energji të gjelbër…efiçiencë të energjisë, ekonomi qarkore, menaxhim i mbeturinave, etj”.
“Fondet e IPA 2022 do të kombinohen edhe me fondet e bashkëfinancuara nga Kosova në vlerë 4.7 milionë euro dhe disa financime nga partnerët e tjerë prej 24.88 milionë. Përmes hyrjes në fuqi të marrëveshjes do të mundësohet zbatimi i projekteve të mësipërme që kanë gjithsejt vlerën prej 91.83 milionë eurove”, ka deklaruar Kurti.
Tanimë ky projektligj duhet të ratifikohet në Kuvend.
