Ministri i Bujqësisë, Faton Peci ka thënë se Kosova nuk qëndron mirë me fondin blegtoral, bazuar në një analizë që ai e ka bërë me ekipin e tij.
Andaj ai ka thënë se synim i kësaj ministri është që të krijojë një fond blegtoral, ku do të identifikohen racat e gjedheve që duhet të sillen në Kosovë nga vendet e tjera.
“Fatkeqësisht Kosova nuk qëndron mirë me fondin blegtoral. Me ekipën tonë e kemi bë një analizë prej vitit 1960 e këndej. Trendi në vazhdimësi thotë që Kosova ka shku drejt rënies dhe niveli i lartë i importit të produkteve blegtorale, në këtë rast të qumështit dhe nënprodukteve të tij dhe mishit me nënproduktet e tij është tepër i lartë. Kështu që ne po synojmë të krijojmë një fond blegtoral dhe bashkë me ekspertë ndërkombëtarë po identifikojmë se cila është raca e gjedheve që në vlerësojmë se duhet sjellë në Kosovë në mnëyrë që t’i ofrojmë përkrahje fermerëve, jo vetëm në mekanizëm bujqësor dhe ndërtim të shtallave por edhe në rritjen e fondit blegtoral”, ka thënë Peci në InfoNata në Tëvë 1.
Peci ka thënë se po i shikojnë edhe praktikat më të mira të përmirësimit të racës gjenetikisht në Kosovë
“Njëkohësisht po punojmë që në kuadër të legjislacionit brenda këtij viti t’i ndërmarrim të gjitha veprimet që kanë të bëjnë me rregullimin e çështjes së fushëveprimtarisë së veterinerëve në Kosovë, mandej edhe për të parë se cilat janë praktikat më të mira dhe efektet positive edhe në përmirësimin e racës gjenetikisht në Kosovë në mënyrë që të rrisim rendimentin dhe produktivitetin për këto veprimtari të cilat janë shumë të domosdoshme për ekonominë e vendit”, ka shtuar tutje ai.