Ministri i Punëve të Brendshme, Xhelal Sveçla ka dhënë detaje për rastin e mbrëmshëm në Zveçan, ku një pjesëtar i komunitetit serb u plagos nga një zyrtar i policisë së Kosovës.
Sveçla ka thënë se sipas hetimeve të para, vetura që ishte në lëvizje e ku po qëndronte person ii plagosur, nuk e kishte respektuar sinjalin e policisë për ndalim.
“Pas kësaj, një zyrtar policor ka shtënë me armë në drejtim të veturës ku si pasojë, ka mbetur i plagosur qytetari M.J”, ka shkruar Sveçla.
Sveçla ka shtuar se përpos arrestimit, të katër zyrtarëve u është caktuar edhe masa e paraburgimit për 48 orë.
“…Me dyshimin se tre zyrtarë policorë nuk kishin raportuar lidhur me rastin dhe një zyrtar për mos raportim si dhe për përfshirjen e tij në rast. Të njejtit gjatë ditës me rekomandim të IPK-së janë suspenduar nga PK”, ka shkruar Sveçla.
Ministri ka thënë se me qëllim të zbardhjes së të gjitha rrethanave hetimet do të vazhdojnë intensivisht.