Presidenti serb, Aleksandër Vuçiq, publikisht ka deklaruar se e ka njoftuar Emmanuel Macronin, Olaf Scholzin dhe Anthony Blinken se nuk do t’i zbatoj të gjitha pikat e marrëveshjes së arritur me Kosovën.
Por, aneksi i zbatimit në pikën dy të tij, obligon palët që të respektojnë të gjitha nenet, si të marrëveshjes ashtu edhe të aneksit.
Për këtë qasje të Serbisë ka reaguar edhe zëdhënësi i Bashkimit Evropian, Peter Stano.
“Pikat e Marrëveshjes, si dhe aneksi, do të përfshihen në kapitullin 35 të kornizës negociuese në rastin e Serbisë. Kjo do të thotë se Serbia ka obligim kontraktual që të zbatojë pikat e Marrëveshjes, nëse dëshiron të arrijë progres në procesin e anëtarësimit. Pra, kemi një marrëveshje dhe një obligim që ajo të zbatohet, pa zgjedhur pjesë të saj”.
Këtë problem dhe paqartësitë e tjera rreth implementimit të marrëveshjes palët pritet t’i diskutojnë në takimin e radhës në Bruksel. Për këtë nga Qeveria e Kosovës i kanë thënë Tëvë1, se takimi i radhës i nivelit të lartë politik pritet të mbahet brenda këtij muaji dhe se së shpejti pritet të konfirmohet edhe data.
Njohësi i procesit të dialogut, Gazmir Raci, thotë se palët e kanë obligative respektimin e marrëveshjeve dhe sipas tij në takimin e radhës në Bruksel, vetëm sa do të shkohet tutje në avancim të zbatimit.
Pritshmëritë janë që brenda vitit 2023 palët të implementojnë të gjitha pikat e marrëveshjes së arritur në Bruksel e Ohër.
Kronika e realizuar nga gazetari Valmir Gallopeni