Ambasadori i Serbisë në Uashington, Marko Gjuriq, tha sot se Serbia dhe SHBA-të po bashkëpunojnë më ngushtë se kurrë në tri dekadat e fundit dhe se pavarësisht nga pikëpamjet e ndryshme të dy vendeve për Kosovën, ka shumë fusha në të cilat të dyja vendet mund të zhvillojnë bashkëpunim.
Gjuriq, i ftuar në emisionin “Pravi ugao”, tha se çdo ditë mundohen të kapërcejnë gjithçka që ka mbetur në një farë mënyre negative nga 142 vite marrëdhënie mes Serbisë dhe ShBA-së.
Duke iu përgjigjur pyetjes se si mund të përmirësohen marrëdhëniet me Amerikën nëse Serbia nuk e njeh Kosovën, nuk vendos sanksione ndaj Rusisë dhe distancohet nga Kina, Gjuriq theksoi se pavarësisht nga këto mosmarrëveshje, të dyja vendet kanë interesa të përbashkëta, mbi të gjitha në stabilitetin dhe integrimin rajonal.
“Ne duam të ruajmë stabilitetin në veri të Kosovës, Kurti vazhdimisht po e shkel atë. Duhen tre gjëra për t’i krijuar parakushtet për çdo gjë të mëtejshme. Të tërhiqen forcat speciale që kanë qëndruar ilegalisht në veri të Kosovës që nga shkurti i vitit të kaluar, e cila shkel nenin 9 të Marrëveshjes së Brukselit, pastaj të ndalohet terrorizmi dhe arrestimet arbitrare, si dhe gjykimet që mbahen në gjykata jashtë dhomave të shumicës serbe dhe jashtë gjykatësve dhe prokurorëve serbë dhe është e nevojshme të ndërmerren hapa të dukshëm drejt formimit të Asociacionit të Komunave me shumicë serbe, tha Gjuriq, shkruan Kosovo Online.
Në Uashington, ka përsëritur ai, nuk ka më mirëkuptim për këtë politikë të Kurtit.
“Në të gjitha takimet dhe bisedat që kam në SHBA, kam hedhur dritë të re mbi atë që po ndodh në terren. Nuk ka asnjë simpati për qasjen që shkakton destabilitet në Evropën Juglindore. Përshtypja ime është se Amerika nuk dëshiron që Ballkani të ‘fillojë të digjet’ në këtë moment. Unë po kërkoj sanksione në Uashington për Kurtin dhe këtë pa mëdyshje sepse po jap argumente se ai po minon interesat amerikane në rajon dhe se po e largon rajonin në mënyrë strategjike nga qëllimet që duhet të jenë të përbashkëta për ne. Shumë në SHBA po avokojnë që Prishtina nuk duhet të ketë më mbështetje bllanko”, theksoi ai.