Në orët e mbrëmjes të së dielës, një ashensor në lagjen Emshir të kryeqytetit ka rënë nga kati i dytë. Si pasojë kanë mbetur të lënduar tre persona. Banorët e këtij objekti shprehin shqetësim, pasi që ky incident po ndodh për të dytën herë brenda pak kohësh.
Ashensori i njërës ndërtesë në lagjen “Emshir” në Prishtinë është jashtë funksionit. Kjo pasi mbrëmjen e së dielës, i njëjti ka rënë nga kati i dytë në bodrum, përderisa në të ishin 9 persona, tre prej të cilëve kanë marrë tretman mjekësor pas lëndimeve trupore që kanë marrë.
Sipas banorëve të kësaj ndërtese, ky incident ka ndodhur brenda 24 orëve që kur kompania mirëmbajtëse e ashensorëve ka intervenuar në prishjen që ka pasur ky ashensor.
Ndërkohë, shqetësim lidhur me situatën kanë shprehur edhe banorët.
E eksperti i ashensorëve Ahmet Shala, i cili ka inspektuar edhe rastin e parë të rënies së ashensorit në këtë objekt, thotë se sipas përshkrimeve gjasat për të qenë problemet e njëjta janë të mëdha.
Madje, sipas tij edhe do të shqyrtohet mundësia për heqjen e plotë nga funksioni.
Rasti është konfirmuar edhe nga Policia e Kosovës, të cilët kanë deklaruar se po punojnë në zbardhjen e rrethanave.
Kronika e realizuar nga gazetarja Valëza Sylejmani
