Nënkryetari i LDK-së, Lutfi Haziri ka folur rreth gjykimit në Hagë ndaj ish-krerëve të UÇK-së e ku në disa raste nga Prokuroria është përmendur edhe LDK-ja.
Haziri ka shkruar se nuk ka zbardhje të fakteve në rastet e veçanta për emrat e veçantë, përderisa ka thënë që nuk është parë që eksponentë të LDK-së që do të jenë subjekt i zbardhjes së drejtësisë.
“Besojmë shumë që drejtësia e vendosur përmes Dhomave të Specializuara do të jetë e barabartë për të gjithë dhe uroj që pastërtia e luftës dhe pastërtia e kryengritjes dhe rezistencës politike dhe ushtarake të konfirmohet jo në dëm të askujt, duke përfshirë jo vetëm pakicat etnike, por edhe individët. Në këtë rrafsh, e vërteta e madhe është që drejtësi duhet të vendoset për të gjithë dhe kompensimi me drejtësi për viktimat dhe rastet që Dhomat e Specializuara i kanë në hetime, duhet të vendoset po ashtu”, ka shkruar Haziri.