Ish-ndihmëssekretari i shtetit në administratën e presidentit Kllinton, James Rubin, ka thënë se tani ka perspektivë për një të ardhme më të ndritur për rajonin nëse zbatohet marrëveshja ndërmjet Serbisë dhe Kosovës.
Këto komente Rubin i ka bërë në Mal të Zi atje ku po qëndron për një vizitë, transmeton teve1.info.
SHBA-ja, siç tha ai, i mirëpret marrëveshjet në të cilat po punon BE-ja dhe ndihmon Kosovën dhe Serbinë në mënyrë që popujt që të kenë marrëdhënie normale, t’u mundësohet të jetojnë pranë njëri-tjetrit, të njohin simbolet, të drejtat e pakicave, liritë dhe të ecin përpara.
“Unë shoh dallime të mëdha në krahasim me kohën e luftës, mjerimit, masakrave masive të civilëve të pafajshëm… Tani mund të shohim perspektivën e Kosovës dhe Serbisë për anëtarësim në BE, nëse liderët e pranojnë shansin që u është dhënë… Ata thjesht duhet të marrin disa vendime të vështira. Asgjë e mirë nuk ndodh në botë nëse nuk merren vendime të vështira. Disa vendime të vështira tashmë janë marrë, por duhet të merren disa të tjera”, ka deklaruar Rubin, shkruan “Vijesti.me”.
