Ish-deputeti i VV-së, Fisnik Ismaili, në 24 vjetorin e Betejës së Koshares ka folur për një rast që sipas tij ka ndodhur pasi që i ishte bashkuar Vetëvendosjes.
Ismaili ka shkruar se dikur më 2013 apo pas këtij viti, e kishte detyruar tashmë kryeministrin Kurti që t’i vizitonte varrezat e të rënëve të Betejës së Koshares.
“Albin Kurtin, që sot s’e përmend UÇK-në, e pata shti me zor me shkue, mbasi pata nisë me u marrë me politikë, diku kah 2013 a më vonë, e ai e përdorte UÇK-në për me fitue vota”.
Megjithatë sipas Ismailit as politikanë tjerë nuk kanë bërë shumë për t’i respektuar të rënët e kësaj beteje.
Edhe për ish-presidentin Thaçi thotë se i vizitoi varrezat “prej zori”.
“Hashim Thaçi mbas nja 17-18 vjetësh pat shkue, sepse e ka pa që si President duhet me e organizue nën patronatin e tij, e me qenë aty”, ka shkruar Ismaili
Ismaili shkruan po ashtu se ish-presidenti Rugova asnjëherë s’i ka vizituar varrezat për përvjetor e për presidenten aktuale, Vjosa Osmanin, thotë se fryhet me betejën “si me pas qenë Prindoni najfarë gjenerali i kësaj beteje”.
Ish-deputeti thotë po ashtu se të gjithë politikanët e kanë injoruar Memorialin e Koshares.
“Krejt politikanët e kanë injorue kur i është dashtë kujdesi, e e kanë përdorë vetëm kur iu ka vye për me u frye me to. Sot të njajtit shkojnë në Koshare, ulen nëpër do karrige rreth një bine, thurrin fjalime lavdi për me i postue në Facebook, edhe zhduken”, ka shkruar Ismaili.
