Deputetja e PDK-së, Ariana Musliu Shoshi ia ka kujtuar disa deklarime të mëhershme për Asociacionin zv/kryeministrit Besnik Bislimi.
Musliu-Shoshi ka lëshuar një audioincizim të një interviste të mëhershme të Bislimit, kur ai thoshte se nëse do të ketë Asociacion si me kompetenca ekzekutive apo jo, nuk do të jetë më në dialog.
“Në atë moment kur Qeveria e Kosovës e ndryshon qëndrimin për Asociacion edhe thotë do të krijohet Asociacion, qoftë edhe me kompetenca joekzekutive, Besnik Bislimi më s’është në dialog, ndoshta dikush tjetër vjen e bon”, kishte thënë Bislimi.
Kryenegociatori iu ka përgjigjur Musliu-Shoshit, duke thënë se në të njëjtën intervistë kishte deklaruar se për minoritetet do të diskutohet kur sovraniteti territorial nuk është në pikëpyetje.
Për këtë e ka ftuar Musliu-Shoshin të nxjerrë konstatime nga Marrëveshja e Brukselit.
“Është e pakuptimtë epshi juaj për me marrë vëmendje publike, por është e parëndësishme. Në momentin kur përcillni intervistë, përcilleni intervistën jo fjalinë. Në të njëjtën intervistë të cilën ju i referoheni thuhet si vijon: Për çështjen e minoriteteve do të diskutojmë atëherë kur sovraniteti, integriteti territorial dhe funksionaliteti i Kosovës nuk është në pikëpyetje. Asnjëra prej këtyre kushteve nuk është përmbushur. Është deklaratë e 23 qershorit 2022. E nderuara deputete, merreni Marrëveshjen e Brukselit dhe nxjerreni konstatimin lidhur me atë se a vihet në pikëpyetje sovraniteti territorial, a kemi marrëveshje formale me Serbinë dhe çka thuhet mbi funksionalitetin e Kosovës”, ka deklaruar Bislimi.
Musliu-Shoshi iu kundërpërgjigj me një audioincizim tjetër ku dëgjohet kryeministri Kurti duke thënë se në marrëveshje ka Asociacion.
“Ka Asociacion. Neni 10 thotë që të dy palët e konfirmojnë obligimin për të zbatuar marrëveshjet e kaluara”, dëgjohej kryeministri në audioincizim.
Pasataj deputetja e PDK-së e pyeti Bislimin se kur do të japë dorëheqje.
“Tash pyetja ime është kur po jep dorëheqje, se nuk ke kredibilitet më me qenë kryenegociator?”, pyeti ajo.
Megjithatë pyetja e Musliu-Shoshit nuk mori përgjigje nga Bislimi.
