Ministri i Financave, Hekuran Murati i ka reaguar kryetarit të komunës së Prishtinës, Përparim Rama, i cili tha se kjo ministri kishte bllokuar bartjen e të hyrave vetanake të komunave nga vitet paraprake.
Sipas Ramës ishin mbi 28 milionë euro të bllokuara për 172 investime kapitale në komunën e Prishtinës.
Sipas Muratit, ligji e thotë ashtu që të hyrat vetanake të pashpenzuara për vitin paraprak barten në vitin vijues.
“Çështja që e pashë që u ngrit nga kryetari Përparim Rama për të hyrat vetanake, kjo çështje rregullohet nga Ligji për menaxhimin e financave publike dhe përgjegjësitë, ku thuhet që të hyrat vetanake të pashpenzuara të komunës për vitin paraprak barten në vitin vijues”, ka thënë Murati.
Sipas tij amandamenti që e rregullon këtë ishte mbështetur edhe nga LDK-ja.
“Kjo gjë pastaj rregullohet edhe me nenin 9, paragrafi 6 të ligjit të Buxhetit i cili e thotë të njëjtën gjë, pra të hyrat vetanake nga viti 2022 barten në vitin 2023. Pra kjo është në tërësi në përputhje me ligjin për menaxhimin e financave publike, madje nëse ju kujtohet ka qenë pikërisht ky nen, paragrafi 6 që është amandamentuar nga grupi parlamentar i LDK-së dhe është votuar edhe nga VV. Domethënë ka qenë një konsensus sa i përket atij amandamenti”, ka deklaruar ai.
https://teve1.info/lajmet/rama-ministria-e-financave-po-bllokon-bartjen-e-te-hyrave-vetanake-te-komunave-nga-vitet-paraprake/
