Sot, gjatë seancës plenare në Kuvendin e Kosovës, Lista Serbe nuk merr pjesë. E kjo ka ngjallur shqetësim te deputeti i Lëvizjes Vetëvendosje, Dimal Basha.
Basha tha se deputetët e Listës Serbe kanë ardhur në Kuvend vetëm për të nënshkruar mëditjet, mirëpo sipas tij, prezenca e tyre do ishte me rëndësi për t’i diskutuar ngjarjet aktuale në veri.
“Prezenca e deputetëve të Listës Serbe, të cilët vetëm erdhën dhe nënshkruan për mëditje, për t’i ikur mundësisë për ta humbur edhe mandatin, së paku trajtimin e humbjes së mandatit dhe dolën nga Kuvendi i Kosovës. Do ishte e rëndësishme që ata të ishin këtu për të dëgjuar gjendjen e vështirë në veri, djegien e veturave të qytetarëve serb, rrahjet dhe torturat ndaj qytetarëve serb që kërkojnë dhe dëshirojnë të jenë pjesë e zgjedhjeve legale në Republikën e Kosovës, linçimin ndaj qytetarëve që refuzojnë t’i nënshtrohen dhunës dhe monopolit politik të asaj zone”, deklaroi Basha para deputetëve në Kuvend.
Madje, Basha vlerësoi që Qeveria e Kosovës po e mbron qytetarin serb në veri, më shumë se përfaqësuesit e tyre të Listës Serbe, raporton teve1.info.
“Ka studime që tregojnë që qytetarët serb nuk guxojnë të shprehin mendimin e tyre të lirë në atë pjesë. Kemi vetëm një parti politike, pra në atë hapësirë nuk ka pluralizëm. Deputetët e Listës Serbe vijnë marrin pagë dhe i shërbejnë Vuçiqit, por asnjëherë qytetarëve serb në atë hapësirë të vendit”, theksoi tutje Basha./teve1.info/.
