Kryeministri i vendit, Albin Kurti, deklaroi se brenda muajit prill do të ketë një takim të nivelit të lartë, derisa përsëri theksoi që duhet të ketë patjetër zbatim të marrëveshjes.
Këtë deklaratë Kurti e dha në një prononcim për media, para se të raportojë në Kuvend për punën dyvjeçare të Qeverisë. Njëherit, Kurti përmendi edhe çështjen e të pagjeturve, duke thënë se kur përdoret termi “persona të zhdukur”, gjithmonë bëhet fjalë “për të zhdukurit me dhunë”.
“Atëherë kur deklarohet e thuhet “persona të pagjetur, të zhdukur e që mungojnë”, gjithmonë bëhet fjalë për të zhdukurit me dhunë. Së bashku me zëvendëskryeministrin, do t’i analizojmë rezultatet nga takimi që është mbajtur në Bruksel më 4 prill dhe mandej do të përcaktojmë një ecje përpara për muajin prill, brenda së cilit do të ketë një takim të nivelit të lartë. Mirëpo, po e theksoj edhe një herë, duhet të zbatohet e gjithë marrëveshja dhe në kuadër të saj kemi një nen që është për zbatimin e marrëveshjeve të mëhershme. Por, si një çështje urgjente në aneksin e zbatimit që u dakordua në Ohër, parashihet pikërisht çështja e të pagjeturve nga lufta, përkatësisht e të zhdukurve me dhunë”, deklaroi Kurti./teve1.info/.
Kurti, sot pritet të raportojë para deputetëve, ku do të diskutohet puna dyvjeçare e Qeverisë së Kosovës.
Kjo seancë është paraparë të nisë nga ora 10:00./teve1.info/.
