Është fshat pothuajse i braktisur.
Por, dy dekada më parë Divjaka festoi një nga 28 nëntorët më të veçantë.
Në këtë fshat të Lipjanit, atë ditë të vitit 98’, ndodheshin qindra ushtarë të Ushtrisë Çlirimtare të Kosovës.
E atyre nga foltorja, iu drejtua vet zëdhënësi i UÇK-së, Jakup Krasniqi.
Por, këtë festë këtu nuk e shënuan vetëm ushtarët.
Bashkë më ta, po festonte edhe Fehmi Bajraktari, nga Kishnareka e Drenasit.
Nipi Ardiani, tregon se si përfundoi axha i tij, në skenë prapa Jakup Krasniqit.
“Ai u gjend rastësisht këtu, u gjend në një vizitë tek një tezak i tij. Në fakt është shënimi i festës së 28 nëntorit të vitit 1998”, tha Ardian Bajraktari.
Disa muaj pas kësaj video, me 3 prill të vitit 1999, Fehmi Bajraktari u vra nga forcat serbe.
I fundit që e pa të gjallë para shtëpisë, ishte vet Ardiani.
“E kam ftuar të na bashkëngjitet me pjesën tjetër të fshatit e të vazhdojmë për në Bjeshkët e Berishës…”, shtoi ai.
Pas përfundimit të luftës, trupi i Fehmi Bajraktari, u gjet në këtë rrugë të fshatit.
“Për shkak të moshës nuk me kanë lënë ta shoh, më kanë treguar më të mëdhenjtë që kokën e ka pasur të hequr dhe e ka pasur disa metra larg trupit të tij”, tha ai.
E ky përvjetor i vrasjes së 54-vjeçarit, për familjen Bajraktarit, për familjen ishte nga më të rëndit.
Kjo pasi në ditën kur u bën 24 vjet nga vrasja e tij, ky imazh u përdor nga Prokuroria Speciale në Hagë, kundër ish-zërit të UÇK-së, Jakup Krasniqit.
“Ngjalli një ndjesi zhgënjyes për këtë proces, që nuk e kishim menduar asnjëherë në jetën tonë. Të përdorën imazhe të tilla kundër ish-krerëve të UCK, këtë mund ta bëj vetëm një prokurori që është si rezultat i një procesi të montum ruso-serb”, tha Ardian Bajraktari.
Për vrasjen e të moshuarit, as pas 24 vjetëve, nuk ka të dënuar e as të arrestuar.
Kronika e gazetarit Fidan Zejnullahu.
