Kryeministri i Shqipërisë, Edi Rama ka bërë një reagim lidhur me raportimet e sotme në media për hartën që shfaqte Kosovën si pjesë të Serbisë e që u përdor në një prezantim të organizuar nga ministria e Turizmit të Shqipërisë.
Kryeministri shqiptar ka thënë se kombit s’i erdhi asgjë e keqe nga dalja 1 minutë e kësaj harte.
“Kinse patriotët kanë gjetur punë sot duke u marrë me një hartë të prezantimit të presidentit të gjigandit spanjoll Melia Group në konventën e turizmit, ku mungonte Kosova! Dihet që Spanja ashtu e ka hartën e rajonit po asgjë e keqe s’i erdhi kombit nga dalja 1 minutë e asaj harte”, ka shkruar Rama në Twitter.
Rama ka thënë se Shqipëria nuk është si Irani, ku të ftuarve në konferenca ndërkombëtare i kontrollohen prezantimet.
Sipas tij, e keqja e kombit vjen nga ata që merren tërë ditën me luftëra mes shqiptarëve, që ai i ka cilësuar pa lidhje.
“Shqipëria s’është Irani ku të ftuarve në konferenca ndërkombëtare u kontrollohen prezantimet dhe as konventa s’ishte sheshbeteja diplomatike për njohjen e Kosovës nga Spanja! E keqja kombit tonë i vjen bash nga ata që merren tërë ditën me kësi luftrash pa lidhje mes shqiptarësh!”, ka shkruar kryeministri.
Kinse patriotët kanë gjetur punë sot duke u marrë me një hartë të prezantimit të presidentit të gjigandit spanjoll Melia Group në konventën e turizmit, ku mungonte Kosova!Dihet që Spanja ashtu e ka hartën e rajonit po asgjë e keqe s’i erdhi kombit nga dalja 1 minutë e asaj harte!
— Edi Rama (@ediramaal) April 5, 2023
Prezantimi kishte ndodhur dje, ku në panelin e folësve ishte prezent edhe vetë ministrja shqiptare Belinda Balluku, derisa në organizim ishin një numër i madh i të pranishmëve.
https://teve1.info/lajmet/kosova-shfaqet-si-pjese-e-serbise-ne-ngjarjen-e-organizuar-ne-shqiperi/
