Rivaliteti më i ndezur i futbollit italian vjen me një akt spektakolar. Juventus – Inter luhet këtë të martë, me dy armiqtë e përbetuar të futbollit të përtej Adriatikut që këtë herë përplasen në kërkim të një bilete për në finalen e Kupës së Italisë.
Gjysmëfinalja e parë do të luhet në “Allianz Stadium”
Derbi i Italisë premton edhe këtë herë spektakël dhe emocione, Juve – Inter mbetet klasikja për ekselencë e futbollit italian, teksa situata që përjetojnë skuadrat e bën akoma dhe më të inkandeshente.
Bardhezinjtë vijnë në këtë përballje të karikuar si rrallëherë: në 9 ndeshjet e fundit kanë regjistruar 8 fitore dhe vetëm një humbje, janë 5 sukseset radhazi ndërkohë që në dy të fundit, mundën pikërisht Interin në kampionat me golin e firmosur nga Kostic, ndërsa më pas mposhtën edhe Veronën.
Nga ana tjetër, Simone Inzaghi prezantohet në “Allianz Stadium” në mënyrën më të keqe të mundshme, Interi vjen në këtë sfidë pas 3 disfatave radhazi në kampionat, teksa ka shijuar vetëm një herë suksesin në 5 ndeshjet e fundit, në fitoren 2-0 ndaj Lecces.
Humbja ndaj Fiorentinës ka pështjelluar edhe më shumë ujërat, të shumtë janë ata që kërkojnë shkarkimin e Inzaghit, me trajnerin që varet në fije të perit, e megjithatë duket se do të rezistojë të paktën deri në sfidën e parë të çerekfinaleve të Championsit me Benfikën.
Skuadra ndërkohë ka humbur identitetin, me sulmuesit që janë një kopje e shëmtuar e atyre të sezonit të shkuar, teksa tani në rrezik është vënë edhe vendi i katërt në kampionat, që siguron pjesëmarrjen në Champions për edicionin dhe për Interin kjo sfidë mund të jetë një udhëkryq i rëndësishëm për të përcaktuar se si do të jetë finalja e sezonit.
Juventusi aktualisht në vendin e 7-të të klasifikimit me 44 pikë, por nëse llogariten edhe 15 pikët e hequra nga dënimi për çështjen e falsifikimit të bilanceve, do të ishte në vendin e dytë, me Max Allegrin që përsërit se ky është klasifikimi real i bardhezinjve.
Për sa u përket formacioneve të mundshme, në shtëpinë e Juves Allegri, pas “turnoverit” në kampionat, duket se do t’u besojë më të mirëve në sulm, Vlahovicit dhe Di Marias, edhe pse mbetet i mundshëm dhe opsioni Kean në modulin 3-5-2, ku në të djathtë Cuadrado është në avantazh ndaj De Sciglios, teksa në portë mund të jetë Perin.
Inzaghi për transfertën e Torinos do të jetë sërish pa turkun Calhanoglu e Skriniar, moduli i nisjes do të jetë tradicionali 3-5-2, me Lautaron që do të rikthehet nga minuta e parë, ndërkohë që në krah të tij ka më shumë shanse të jetë Dzeko sesa Lukaku, shpërdorues i pabesueshëm ndaj Fiorentinës
