“Duke marrë parasysh se ka 540,000 banorë dhe rreth 150,000 njerëz të evakuuar në tre ditët e para kur ishte ende e sigurt për ta bërë këtë, ne vlerësojmë rreth 350,000 njerëz të ngecur në Mariupol”, ka thënë Petro Andriushchenko, këshilltar i kryetarit të bashkisë së Mariupolit, në televizionin ukrainas, raportoi CNN.
Përpjekjet e shumta zyrtare për të krijuar korridore të sigurta dhe për të evakuuar civilët nga Mariupol kanë dështuar ditët e fundit. Sipas zyrtarëve, një kolonë e madhe e ndihmave humanitare që ishte menduar të mbërrinte të dielën nuk ka arritur ende në qytet.
“Shumica e njerëzve po qëndrojnë në bodrume dhe strehimore në kushte çnjerëzore. Pa ushqim, pa ujë, pa rrymë, pa ngrohje”,është shprehur ai, duke shtuar se njerëzit po shkrinin borën dhe po çmontonin sistemin e ngrohjes për të marrë ujë për të pirë.
Duke folur për viktimat civile, Andriushchenko tha se, që nga e diela, 1,800 njerëz u konfirmuan se ishin vrarë. Ndërsa të hënën, Oleksiy Arestovych, një këshilltar në zyrën e Presidentit Volodymyr Zelensky, ka thënë se bombardimet ruse të Mariupolit kanë shkaktuar më shumë se 2,500 vdekje./KSP/
