Këngët me motive patriotike, i nisën në Ferizaj.
E njëjtë veproi, edhe Drenasi.
E rrugës për në Prishtinë, iu bashkua, e gjithë Kosova.
Të gjithë këta qytetarë, synim kishin, sheshet kryesore të Prishtinës.
Krejt kjo, në kuadër të Marshit për Drejtësi, të organizuar nga platforma “Liria ka Emër”
Në këtë formë, dhjetëra mijëra qytetarë sot marshuan në Prishtinë, për ta mbrojtur luftën e pastër të Ushtrisë Çlirimtare të Kosovës.
Njëri nga ata që mori pjesë në këtë marsh, ishte edhe Milazim Thaçi.
Ky i fundit është i mbijetuar i Masakrës së Izbicës.
“Kurrë nuk e kisha mendu që vjen kjo dita me dalë me protestuar për djemtë tanë të cilëve i kanë bo padrejtësi dhe i kanë çu në Hagë”, tha ai.
Në këtë formë, mesditën e së dielës, sheshet e kryeqytetit u mbushën me flamuj kombëtar dhe ata të UÇK-së.
Rreth orës 15:00, nga sheshi “Zahir Pajaziti” tek ai “Skënderbeu” marshuan dhjetëra mijëra qytetarë, të cilëve iu prinë familjarët e ish-krerëve të UÇK-së, që tani ndodhën për gjykim në Hagë.
Brohoritjet u shtuan kur u kuptua se këta të fundit, këtë marsh po përcillnin direkt nga Haga.
Drejtësi për ish-krerët e UÇK-së në Hagë, kërkuan edhe familjarët e të pagjeturve.
E Fahrije Hoti nga Krusha e Madhe, që ende nuk di për fatin e bashkëshortit, tha se në Hagë për gjykim ndodhen njerëzit e gabuar.
Ndërkohë organizatorët e këtij marshi, bën të ditur se të pranishëm në këtë marsh, ishin rreth 100 mijë qytetarë.
Të hënën në Gjykatën Speciale në Hagë, fillon gjykimi ndaj ish-eprorëve të UÇK-së, Hashim Thaçit, Kadri Veselit, Rexhep Selimit e Jakup Krasniqit.
Kronika e gazetarit Fidan Zejnullahu.