Drejtori i të ashtuquajturës Zyrës për Kosovën në Qeverinë e Serbisë, Petar Petkoviq, tha se në vazhdimin e dialogut Beograd-Prishtinë më 4 prill në Bruksel do të ndërmerren hapa konkretë për zbatimin e marrëveshjes së Ohrit me vija të kuqe të shënuara qartë – që Beogradi kurrë nuk do të pajtohet që Kosova të bëhet anëtare e OKB-së dhe se Beogradi as de fakto dhe as de jure nuk do ta njohë Kosovën.
Petkoviq tha se ndër obligimet e para që duhet të përmbushen, e paraparë me tekstin e aneksit, është formimi i Asociacionit të Komunave me shumicë serbe dhe kjo, thekson ai, është në përputhje me marrëveshjet e mëparshme përkatëse nga dialogu në të cilat janë të përcaktuara qartë kompetencat e tij thelbësore.
“Vijat tona të kuqe janë se Beogradi nuk do të pajtohet kurrë që e ashtuquajtura Kosova të bëhet anëtare e OKB-së dhe se Beogradi as de fakto dhe as de jure nuk do ta njohë të ashtuquajturën Kosovë. Ne mund të diskutojmë gjithçka tjetër që është rënë dakord në aneks dhe shikoni se si do ta zbatojmë atë”, tha Petkoviq për Radio Beogradin.
Petkoviq ka shtuar se kur bëhet fjalë për kompetencat e Asociacionit të Komunave me shumicë serbe, nuk janë të rëndësishme as vendimi i Gjykatës Kushtetuese të Kosovës, as letra e Federica e Mogherinit dhe as qëndrimet e Escobar dhe Chollet të publikuara në formë të editorialit.
“Gjithçka mund të dëgjojmë ditët e fundit nga ato që do të thuhen në Prishtinë, me qëllim shmangien e detyrimeve që kanë për formimin e Asociacionit, se do ta formojnë në përputhje me vendimet e të ashtuquajturës Gjykatë Kushtetuese, konform letrës së njëanshme të Mogherinit, Isa Mustafës apo në bazë të disa shkrimeve gazetareske, çka është absolutisht e pakuptimtë. Dihet saktësisht se çfarë është dakordësuar në Bruksel, bëhet fjalë për marrëveshjen e parë të vitit 2013. Po në të njëjtin vit është miratuar plani i zbatimit të marrëveshjes për normalizimin e marrëdhënieve mes Beogradit e Prishtinës, kemi marrëveshje për fushëveprimin dhe mandatin e ekipit drejtues e më pas parimet e përgjithshme për Asociacionin të vitit 2015, ku është përcaktuar qartë se cilat janë kompetencat thelbësore të Asociacionit, qëllimet e saj, organet, si funksionon, përfshirë pikën 16 e cila përcakton saktësisht se Beogradi e financon atë” ka thënë Petkoviq.
