Administrata Tatimore e Kosovës (ATK) vlerëson se projekti specifik për përmbushje tatimore, i nisur vitin e kaluar, i ka dhënë rezultatet e veta sidomos në fushën e hotelerisë dhe gastronomisë.
Ky institucion ka bërë të ditur se gastronomia dhe hoteleria kanë paguajtur tatim më 2022 për 117 % më shumë se më 2021.
“Thirrjet e shpeshta nga ATK për të përmubushur detyrimet dhe puna në teren, kanë rezultuar që statistikat nga ky sektorë të jenë në një nivel të kënaqshëm, duke filluar nga qarkullimi i deklaruar me 24.24% ose 64 milion euro, pagesa 117.08% ose 10 milion euro dhe numri punëtorëve 14.45% ose 2,820 punëtorë më shumë se viti i kaluar. Pastaj, duke vazhduar me gjetjet nga tereni, si qarkullimi shtesë nga vizitat me dallim enorm prej 321.95% më shumë se vitin e kaluar”, thuhet në njoftimin e ATK-së.
ATK vlerëson se rritje për mëse 100 % pati edhe formalizimi i punëtorëve.
“Dihet që në sektorin e gastronomisë dhe hotelerisë përveç atyre që u përmend, si dukuri e cila mbetet ndër faktorët kyç të informalitetit janë edhe punëtorët e padeklaruar, e kjo është dëshmuar edhe nga puna e inspektorëve, të cilët për 2022 kanë formalizuar 111.84% punëtorë më shumë se vitin e kaluar. Ajo çka vlen të potencohet është se ky sektor prin me statistika sa i përket fiskalizimit, por mbetet sfidë lëshimi i kuponëve fiskal”, thuhet në njoftim.
