Shkolla fillore “ Dituria” në Shkabaj të Prishtinës po përballet me kushte jo të mira.
Në këtë shkollë nuk ka kabinete, bibliotekë e as sallë sportive.
I pakënaqur me këto kushte po shprehet Sokol Sallahu, prind i cili ka dy fëmijë në këtë shkollë.
“Prind i dy fëmijëve që i kam në këtë shkollë, kushtet nuk janë më të mirat e mundshme ka mungesë shumë, objekti është i vjetër…”, tha SOKOL SALLAHU.
Të pakënaqur janë dhe vet stafi i shkollës.
Zejnullah Halili, mësimdhënës në lëndën e matematikës tash e 23 vjet në këtë shkollë thotë se në përgjithësi janë bërë riparime, por të pamjaftueshme.
“Nuk jemi të kënaqur me kushtet përgjithësi në shkollë edhe pse kohë pas kohë janë bërë disa riparime të vogëla po nuk janë të mjaftueshme, mungon mësimi kabinetik… Ankesat kanë qenë të vazhdueshmë nga komuniteti, prindërit…”, deklaroi Halili.
Krahas kësaj, sipas drejtorit të kësaj shkolle, Landrit Dragusha, prindërit hezitojnë për t’i dërguar fëmijët në këtë shkollë. Kjo meqë shkollat përrreth u ofrojnë kushte më të mira.
“Kushtet më të mira po i shtyejnë prindërit t’i dërgojnë fëmijët e tyre në shkollat përrreth, sepse ne nuk kemi kushte të mira për të ofruar… Ne kemi televizor në klasa por nuk kemi kushte tjera si në shkolla tjera qe fëmijës i duhen krahas shekullit 21, pra arritjet që i synojmë nuk mund në shkollën tonë të arrihen e në shkolla tjera fatmirësisht arrihen…” u shpreh Dragusha.
Tutje, Dragusha thotë se tash e katër vite ka marrë vetëm premtime boshe.
“Kam marrë premtime nga kryetari i mëparshëm Shpendi edhe tash nga Përparim Rama por asgjë…”, tha ai.
Në këtë shkollë aktualisht janë rreth 200 nxënës dhe 29 mësimdhënës.
Kronika e gazetares Lendrina Kodrolli.
