Shumë shkolla në Kosovë vazhdimisht theksojnë mungesën e psikologëve.
Nisur nga kjo, në fund të vitit paraprak, Komuna e Prishtinës kishte hapur konkurs për punësimin e 25 të tillëve.
E përderisa komunat po kërkojnë psikologë, ka prej atyre psikologëve që tashmë janë të punësuar, por që kanë ankesa se nuk po marrin paga.
Ky rast nuk është i vetmi.
Sipas burimeve të tëvë1 ka edhe psikologë të tjerë që nuk janë paguar për më shumë se dy muaj.
Madje nuk kanë marrë asnjë njoftim lidhur me këtë.
E problematike mos-ekzekutimin e pagave për psikologët e punësuar në institucionet arsimore, po e sheh Rinor Qehaja nga Instituti Ed-Guard.
Sipas tij kjo mund të dështojë si pasojë e hallkave institucionale.
“Nëse e rishikojmë buxhetin vjetor të Qeverisë së Kosovës, atje kuptojmë që ka buxhet të alokuar për një numër të madh të psikologëve por që fatkeqsisht asnjëherë nuk rekrutohen nga Komuna. Pra ky është një pjesë e problemit, ndërkaq pjesa tjetër është se për ata pak psikologë që janë të rekrutuar nga Komuna, për të cilët dështojnë pagesat për arsye të ndryshme administrative apo mos komunikimit ndër institucional”, tha Qehaja.
Tëvë1 ka tentuar të marrë një përgjigje nga Ministria e Arsimit, si dhe nga Komuna e Prishtinës, por që të njëjtit nuk kanë qenë të qasshëm.
Paga bazë e një psikologu është afër 600 euro.
Kronika e gazetares Valëza Sylejmani.
