Lista Serbe pas takimit me ambasadorin e Shteteve të Bashkuara të Amerikës në Kosovë, Jeffrey Hovenier, ka bërë të ditur se nuk do të marrë pjesë në zgjedhjet e parakohshme në komunat veriore.
Lista Serbe është deklaruar se nuk do të jenë pjesë e zgjedhjeve deri sa të plotësohet kërkesa e tyre, e që është formimi i Asociacionit të Komunave me Shumicë Serbe, raporton teve1.info.
“Përfaqësuesit e Listës Serbe, qëndruan qartë se partia jonë mbetet konsistente në qëndrimin e saj se nuk do të marrë pjesë në zgjedhjet e ardhshme të parakohshme lokale në komunat në veri të Kosovës, derisa të plotësohen kërkesat që na bënë të largohemi nga institucionet e Kosovës, që është formimi i Bashkësisë së Komunave Serbe dhe tërheqja e të gjitha njësive speciale të Prishtinës nga veriu i Kosovës”, thuhet në njoftim.
Këto zgjedhje të jashtëzakonshme lokale do të mbahen në Mitrovicën e Veriut, Leposaviq, Zveçan dhe Zubin Potok, pasi që në nëntor të vitit të kaluar kryetarët e tyre kanë dhënë dorëheqje.
Ndërkaq, zëdhënësi i Komisionit Qendror Zgjedhor, Valmir Elezi, ditë më parë ka bërë të ditur se 5 subjekte politike e kanë konfirmuar pjesëmarrjen në zgjedhjet e 23 prillit në komunat veriore.
“Kemi pranuar konfirmimin nga 5 subjekte politike që janë pjesë e procesit zgjedhor, është Iniciativa Qytetare ‘Mitrovica’, Partia Demokratike e Kosovës, Partija Kosovskih Srba, një kandidate e pavarur dhe Lëvizja Vetëvendosje”, ka thënë ai për Tëvë1.
