Në përfundim të ditës së parë nga vizita në Strasbourg,, kryeministri i vendit, Albin Kurti është pritur nga mbi 30 ambasadorë të shteteve anëtare në Këshillin e Evropës.
Gjatë takimit, kryeministri ka folur për zhvillimin e Kosovës në demokratizimin e vendit, rritjen ekonomike dhe sundim të ligjit e drejtësisë, raporton teve1.info.
“Kosova ka bërë hapa të mëdhenj drejt demokratizimit dhe zhvillimit ekonomik, tregues të së cilës janë indekset dhe rankimet ndërkombëtare që faktojnë se Kosova është një histori suksesi e demokracisë cilësore dhe zhvillimit ekonomik”, thuhet në njoftimin e Zyrës së Kryeministrit.
Gjatë këtij takimi, Kurti ka diskutuar edhe për aplikimin e Kosovës në Këshillin e Evropës.
Sipas Zyrës së Kryeministrit, Kosova ndan të njëjtat vlera dhe parime me Këshillin e Evropës, të cilat janë të mishëruara edhe në Kushtetutë.
“Ai i falënderoi vendet anëtare për mbështetjen e deritanishme dhe kërkoi nga to vazhdimin e saj për të avancuar tutje në këtë proces deri në anëtarësimin e Kosovës në Këshillin e Evropës”, thuhet në fund të njoftimit.
