Kuvendi i Kosovës dhe Institutit Kombëtar Demokratik (NDI), kanë nënshkruar memorandum mirëkuptimi në lidhje me themelimin e Institutit Parlamentar, avancimin e mbikëqyrjes dhe transparencën në Kuvend.
Këtë marrëveshje kryetari i Kuvendit, Glauk Konjufca e ka vlerësuar si mbështetjen më ta madhe deri tani për këtë institucion.
“Qëllimi i përgjithshëm i memorandumit është të fuqizojë barazinë gjinore, qeverisjen llogaridhënëse dhe integritetin e informacionit. Projekti gjithashtu synon të ofrojë asistencë teknike të bazuar në hulumtim dhe në formë strategjike t’i kontribuojë përkrahjes së avancimit të gjithëpërfshirës, lidershipit politik të grave, të avancojë shërbimet profesionale të Kuvendit, transparencën parlamentare dhe mbikëqyrjen e ekzekutivit”, ka shkruar Konjufca.
Ai ka thënë se i ka shprehur mirënjohje drejtoreshës së NDI-së, Nancy Soderberg për rolin dhe kontributin e çmuar të NDI-së në drejtim të konsolidimit dhe forcimit të kapaciteteve legjislative dhe institucioneve demokratike shtetërore, duke ritheksuar gatishmërinë e Kuvendit për intensifikimin e bashkëpunimit të mëtutjeshëm./teve1.info/
