Ministrja e Drejtësisë së Kosovës, Albulena Haxhiu ka njoftuar se ka kërkuar nga ministrja e Drejtësisë së Serbisë, transferimin në Kosovë të dy shtetasve Nezir Mehmetaj dhe Petrit Dula, të cilët janë të burgosur në Serbi e që nga ky shtet akuzohen për krime lufte ndaj serbëve gjatë vitit 1999.
Ajo përmes një postimi në Facebook ku ka njoftuar se kërkesën e ka dërguar javën e kaluar ka thënë se procesi ndaj këtyre dy kosovarëve është shoqëruar me shkelje të mëdha.
Haxhiu ka thënë se akuzat e pretenduara ndaj tyre duhet të trajtohen nga organet e institucioneve të Kosovës.
“Javën e kaluar kam kërkuar nga Ministrja e Drejtësisë në Serbi që dy qytetarët tanë t’i transferojë në Republikën e Kosovës. Nezir Mehmetaj dhe Petrit Dula mbahen në Serbi mbi pretendimet për kryerjen e krimeve të luftës kundër popullatës civile në Kosovë gjatë vitit 1999. Z.Mehmetaj dhe z.Dula janë qytetarë të Kosovës pra edhe nën mbrojtjen e Republikës. Procesi i deritanishëm ndaj dy qytetarëve të Republikës së Kosovës është i përbërë nga shkelje të rënda të të drejtave të njeriut, për vite të tëra. Çdo akuzë ndaj tyre për krimet e pretenduara, duhet trajtuar nga organet e drejtësisë në Republikën e Kosovës”, ka shkruar Haxhiu, përcjell teve1.info