Dukagjini i Klinës ka shënuar fitoren e dytë rresht në elitën e futbollit të Kosovës, ndërsa Drenica, pësoi disfatë për të dytën ndeshje radhazi.
Dukagjini të shtunën në stadiumin “18 Qershori”, fitoi me rezultatin 2:0 në kuadër të xhiros së 25-të të Superligës së Kosovës.
Nigeriani Oto John kaloi në epërsi Dukagjinin në minutën e 12-të të ndeshjes, pas asistimit të Marclei Santosit.
Dy minuta pasi nisi pjesa e dytë, rezultatin e dyfishoi mbrojtësi Arbër Shala me gjuajtje të fuqishme.
Drenica pati mundësinë që ta ngushtonte epërsinë në minutën e 54-t kur gjyqtari Mervan Bejtullahu dha penallti pas prekjes me dorë të kapitenit Elton Basriu.
Megjithatë, lartë mbi portë gjuajti braziliani Diogo Armando Lopes da Silva.
Pas kësaj fitoreje, Dukagjini mbetet në mesin e tabelës me 32 pikë të grumbulluara.
Drenica në pozitën e fundit ka 23 pikë.
Në xhiron e 26-të, Dukagjini luan në udhëtim te Trepça ’89, ndërsa Drenica në shtëpi e pret Prishtinën.
