Deputeti i Partisë Demokratike të Kosovës, Bekim Haxhiu, ka reaguar ndaj kundërpërgjigjeve nga Bordi i ShKUK-së, të cilët deklaratat e tij i kanë quajtur shpifje.
Haxhiu ka thënë se deklaratat e bordit, të cilat sipas tij janë qesharake, të papërgjegjshme dhe kundërthënëse, nuk mund të ikë nga përgjegjësia e 17 shkeljeve që i ka evidentuar Zyra Kombëtare e Audititmit (ZKA), raporton teve1.info.
“Raporti i Zyrës Kombëtare te Auditimit për ShSKUK për vitin 2021, ka evidentuar keqmenaxhim e keqpërdorime në vlerë mbi 12 milion euro dhe Bordi i ShSKUK-së nuk mund të i ikë përgjegjësi si organi më i lartë vendim-marrës i SHSKUK për dëmin që ia ka shkaktu këtij institucioni dhe buxhetit të Kosovës”, ka shkruar Haxhiu në Facebook.
Ai ka thënë se ka kërkuar nga Qeveria e Kosovës shkarkimin e Bordit të ShSKUK-së për shkak të këtij raporti dhe skandaleve të njëpasnjëshme në këtë institucion.
“Unë disa herë kam kërkuar nga Qeveria e Kosovës shkarkimin e Bordit të SHSKUK për shkak të raportit të ZKA dhe skandaleve të njëpasnjëshme në këtë institucion, por në vend se Bordi i SHSKUK-së të vihet para përgjegjësisë, Qeveria ka vendosur t’i merr në mbrojtje abuzuesit e parasë publike dhe t’i shpërblej disa nga anëtarët e Bordit me pozita të reja në sistemin shëndetësor”, shkroi deputeti.
