Gjatë vizitës në Kroaci, ministrja e Jashtme e Kosovës, Donika Gërvalla është takuar me kryeministrin kroat, Andrej Plenkoviq, me ç’rast ka thënë se marrëdhëniet e shkëlqyera në mes dy vendeve duhet thelluar në të gjitha fushat.
Ajo po ashtu ka vlerësuar lartë që Kroacia, si vend anëtar i BE-së dhe NATO-s e mbështet Kosovën në rrugën e saj integruese euro-atlantike dhe në anëtarësimet e reja ndërkombëtare të saj, përcjell teve1.info
Sipas njoftimit të MPJD-së, Gërvalla ka theksuar se Kosova është e përkushtuar për paqe e stabilitet rajonal dhe promovon fqinjësi të mirë me të gjitha shtetet e Ballkanit Perëndimor, përfshirë edhe normalizimin e marrëdhënieve me Serbinë.
Sipas Gërvallës, thellimi i marrëdhënieve bilaterale me Kroacinë në shumë fusha të interesit të përbashkët është me prioritet për Qeverinë e Kosovës.
“Temë e veçantë e takimit ishte bashkëpunimi ekonomik dhe investimet kroate në Kosovë. Kosova mirëpret investimet kroate dhe ka një ofertë dhe klimë të mirë për investime në shumë sektorë. Ministrja Gërvalla falënderoi Kryeministrin Plenkoviç për mbështetjen e tij personale në Forumin Ekonomik shumë të suksesshëm mes Kosovës dhe Kroacisë të organizuar javë më parë në Prishtinë. Kushtetuta e Republikës së Kosovës garanton të drejta për të gjitha komunitetet që jetojnë në Kosovë, përfshirë edhe komunitetin kroat që jeton në Kosovë. Lidhjen mes dy vendeve tona e bëjnë më të fortë edhe komunitetet tona respektive. Shqiptarët në Kroaci paraqesin një komunitet të fuqishëm, të integruar dhe kontribuojnë në të gjitha fushat në shoqërinë kroate, duke u bërë urë e fortë lidhëse mes Kosovës dhe Kroacisë”, ka deklaruar Gërvalla, bëhet e ditur në njoftimin e MPJD-së. /Teve1.info/