Drejtori i Klinikës së Onkologjisë në QKUK, Ilir Kurtishi është shprehur se kanceri i gjirit te femrat është një ndër format më të shpeshta të përhapura si sëmundje malinje në Kosovë, ndërsa te meshkujt dominon kanceri i mushkërive.
“Format më të shpeshta të sëmundjeve malinje në Kosovë, si dhe në vendet e tjera të rajonit, në Evropë, dominon kanceri i gjirit tek femrat. Kurse tek meshkujt ai i mushkërive. Menjëherë pas këtyre dy sëmundjeve, dominojnë kanceri i zorrës së trashë dhe kanceri i organeve gjenitale tek femrat. Në Kosovë, viteve të fundit, kemi një rritje të kancerit të lukthit, pankreasit tek meshkujt dhe të testiseve. Tek femrat edhe kanceret e organeve tjera dhe përveç organeve gjenitale ka edhe kancer të lëkurës, hyjnë në grupin e sëmundjeve bashkë me sëmundjet e zemrës. Shkaktojnë problemet më të mëdha dhe kanë koston më të lartë edhe të mjekimit edhe të trajtimit. Për këtë arsye duhet të kushtohet kujdes shumë të madh, mënyrës së diagnostifikimit dhe kohës. Kjo pasi që diagnostifikimi i hershëm i këtyre sëmundjeve do të thotë një trajtim i mirë apo formë më e lehtë e mjekimit dhe kosto më e ulët e trajtimit të tyre” ka thënë Kurtishi.
Kurtishi ka thënë se në 5 vitet e fundit ka pasur gjithsejtë 4-5 gra shtatzëna që kanë frekuentuar onkologjinë për shërim të sëmundjes së kancerit dhe ia kanë dalë me sukses shërimit pa dëmtuar foshnjën, si dhe pa pasur nevojë ta ndërpresin shtatzaninë.
“Realisht, nëna shtatzëna me sëmundje malinje kemi shumë rrallë, pasi që ne ndoshta për këto 5 vitet e fundit kemi pasur 4-5 raste dhe ato femra të cilat dy nga to kanë qenë me kancer në gji. Ne iu kemi rekomanduar në konsulte me gjinekologun, që varësisht nga muaji i shtatzënisë që ka qenë ose të vazhdojë shtatzëninë edhe një muaj apo dy nëse ka mundësi të lind, ose të ndërpresë shtatzëninë dhe pastaj ka vazhduar mjekimin në onkologji. Fati i mirë unë kam pasur dy raste, dhe që në të dyja rastet nënat kanë qenë në muajt e fundit të shtatzënisë, kanë lindur, dhe 2-3 javë pas lindjes ne kemi vazhduar mjekimin në onkologji dhe ato nëna janë gjallë, mirë dhe vazhdojnë të rrisin fëmijët e tyre”, u shpreh Kurtishi, shkrun KP.
