Atleti mitrovicas, Muhamet Ramadani, po bën hapa para drejt ngritjes në nivelin serioz evropian. Ramadani të dielën është paraqitur në Kupën Evropiane të Atletikës në hedhje. Dhe ka zënë vend në podium.
Ramadani ka garuar në hedhje të gjyles, në grupmoshën U23. Ramadani ka fituar medaljen e argjendtë me hedhjen më të mirë prej 18.60 metra. Kampion në grupmoshën U23 u shpall turku Alperen Karahan me hedhje prej 19.81 metra. I treti mbeti holandezi Mattijs Mols me hedhje prej 18.56 metra.
Ramadani kishte pesë hedhje të suksesshme, ndërsa një të dështuar. Fillimisht gjylen e gjuajti dy herë në largësi prej 18.29 metra. Hedhjen e tretë e kishte më të dobët, 18.09 metra. Tentimin e katërt e kishte të dështuar, ndërsa hedhjen për medalje, prej 18.60 metra e realizoi në tentimin e pestë. Në tentimin e gjashtë arriti distancë prej 18.27 metra.
Kupa Evropiane në hedhje po mbahet në Portugali.
