Në takimin e 27 shkurtit në Bruksel, kryeministri Albin Kurti dhe presidenti serb, Aleksandar Vuçiq pranuan në parim planin evropian për normalizim të marrëdhënieve.
Kjo po shihet si një sinjal pozitiv edhe për mbajtjen e zgjedhjeve për kryetar të komunave në veri të Kosovës.
Ministri për Komunitete në qeverinë e Kosovës, Nenad Rashiq, thotë se nëse nuk nënshkruhet marrëveshja, Lista Serbe nuk do të marr pjesë në këto zgjedhje për shkak të presionit që i bëhet nga Beogradi.
Pavarësisht kësaj ai u bëri thirrje qytetarëve serbë atje që të dalin masovikisht në këto zgjedhje.
E nga Instituti i Kosovës për Demokraci thonë se këto zgjedhje nuk mund të jenë kredibile e me integritet në rast se do të ketë angazhim të forcave policore më shumë sesa votues.
Televizioni ka tentuar gjatë ditës të marrë përgjigje nga qeveria dhe Komisioni Qendror i Zgjedhjeve rreth përgatitjeve për këtë proces, por që nuk ka pasur përgjigje.
Të paqasshëm kanë qenë edhe Lista Serbe, nga e cila nuk kanë treguar se a do të marrin pjesë ose jo në këto zgjedhje.
Fillimisht data e këtyre zgjedhjeve ishte caktuar m 18 dhjetor të vitit të kaluar, por për shkak të tensioneve në atë pjesë ato u shtynë për më 23 prill.
Kronika e gazetarit Lindrit Zejnullahu.