Policia e Kosovës bën të ditur se në bastisjen e kryer dje në Prishtinë, Ferizaj, Gjilan e Vushtrri janë sekuestruar mbi 83 mijë euro e janë arrestuar 15 persona.
Po ashtu, janë sekuestruar edhe tetë armë, 22 vetura e dy motoçikleta, përcjell teve1.info
Aksioni i djeshëm i Policisë në bashkëpunim me Gjykatën dhe Prokurorinë Themelore në Ferizaj është kryer në 21 shtëpi banimi dhe 11 objekte biznesi.
“Gjatë bastisjes, fillimisht janë arrestuar 14 (katërmbëdhjetë) të dyshuar meshkuj kosovarë dhe më pas është arrestuar edhe 1 (një ) i dyshuar tjetër, nën dyshimin se janë të përfshirë në kryerjen e veprave të cekura, ndërsa si dëshmi janë sekuestruar: 8 (tetë) armë të ndryshme me 76 (shtatëdhjetë e gjashtë) fishekë kalibër i ndryshëm, 2 (dy) shufra metalike, DVR, 22 (njëzet e dy) vetura, 2 (dy) motoçikleta, 83,995 (tetëdhjetë e tre mi e nëntëqind e nëntëdhjetë e pesë) €, 16 (gjashtëmbëdhjetë) USB dhe dokumente të ndryshme. Me vendim të prokurorit të gjithë të dyshuarit janë dërguar në mbajtje”, bëhet e ditur në njoftim.
Dje orët e hershme të mëngjesit, Policia në bashkëpunim me organet e tjera të drejtësisë ka filluar një operacion kundër dukurisë së fajdeve.
Të dyshuarit me urdhër të Prokurorit të Shtetit, janë ndaluar në kohëzgjatje prej 48 orësh, për shkak të dyshimit të veprave penale “Fajdeja”, “Shmangia nga tatimi”, “Detyrimi”. /Teve1.info/
