Deputetja e PDK-së, Blerta Deliu-Kodra në seancën e Kuvendit ku po diskutohet për dialogun, ka thënë se kryeministrit të Kosovës, Albin Kurti prioritetet po i ndërrojnë çdo ditë, raporton Teve1.info
Deliu-Kodra tha se Kurti nuk ka lënë njëri të vetëm në Kosovë pa akuzuar për tradhti, mirëpo siç u shpreh ajo nuk do ta quaj kryeministrin serbofil, por sipas saj, marrëveshja ka shumë probleme.
“Fati i Kosovës sot është më i madh se fati i Albin Kurtit, fati i Kosovës është më i madh se secili nga ne në këtë sallë e secili nga ata qytetarë që sot me kërshëri po e ndjekin çdo moment të zhvillimit politik në Kosovë në raport me dialogun që kryeministrit i ndërrojnë prioritetet çdo ditë. Sot ne kemi para vetës njeriun që nuk ka lënë njëri të vetëm në këtë Kosovë pa e akuzuar për tradhti, sot unë nuk e akuzojë kryeministrin për tradhti e as nuk do ta quaj as serbofil por kryeministër marrëveshja si e tillë ka shumë probleme”, ka deklaruar ajo.
Po ashtu, Deliu-Kodra ka theksuar se përtej deklarimeve për marrëveshje me njohje të ndërsjell në qendër, sot ka para vetës marrëveshje të parakohshme me asociacion në qendër.
“Nëse përtej deklarimeve për marrëveshje finale me njohje të ndërsjellë në qendër, sot kemi para vetës një marrëveshje krejt të përkohshme e cila e ka asociacionin e mbase mund ta ketë autonominë në qendër. Është vështirë me pa me sytë e kryeministrit dhe natyrisht që është shumë e vështirë ta shoh një tjetërsim të Kurtit pa iu dhënë përgjigje qindra mijëra njerëzve që i kanë shkuar pas, e sot na u shpërfaq një Albin Kurt tjetër i veshur e i ulur me petkun e kryeministrit”, përfundoi ajo. /Teve1.info/