Deputetja e Lidhjes Demokratike të Kosovës, Hykmete Bajrami, tha se propozimi evropian shkon edhe përtej Asociacionit të Komunave me shumicë serbe.
Bajrami thotë që partia e saj e sheh si të degraduar procesin dhe për këtë e bënë përgjegjës kryeministrin Albin Kurtin.
“Planin të cilin kryeministri e ka pranuar shkon edhe përtej Asociacionit, e kam fjalën pikërisht për nenin 7, LDK e sheh procesin si shumë të degraduar dhe e bënë përgjegjës pikërisht kryeministrin komplet për këtë keq menaxhim për gjatë dy viteve. Do të thotë prej njohjes në qendër dhe njohjes reciproke ne tash jemi me një marrëveshje, e cila e ka Asociacionin dhe jo vetëm në qendër dhe nuk përmendet fare njohja”, tha Bajrami në emisionin “Info Nata” në Tëvë1.
Ish-ministrja e Financave e konsideron dialogun në një fazë që nuk do të përfundojë asnjëherë.
“Po konsiderojmë qe po hyjmë me një fazë ku dialogu nuk do të përfundojë asnjëherë. Neni 7 është tepër problematik”, tha ajo.
Si parti, ajo ka thënë që janë pro Asociacionit.
“Ne kemi thënë që Asociacioni është obligim ndërkombëtar, të cilin e ka votuar Kuvendi i Kosovës është obligimi yni. Pra, ai do të duhej të bëhej sipas komenteve dhe vendimit të Gjykatës Kushtetuese që do të thotë do të mbetej në termat e një organizate joqeveritare duke mos pasur asnjëherë nivel të pushtetit”, tha ajo.
