Opozita po e kritikon qeverinë për të tashmen dhe të ardhmen e dialogut, ndërsa pushteti po e kritikon opozitën për të kaluarën e këtij procesi.
Deputetja Dorsa Kica – Xhelili, nga radhët e LDK-së thotë se me nenin 7 të planit të BE-së, asociacioni do të krijohet si një nivel i tretë i qeverisjes.
“Cilat janë ato pozicione të nenit 10 lidhur me asociacionin dhe të drejtat për komunitetin e komunave me shumicë serbe që nuk mjaftuan në këtë marrëveshje që duhet të shtohej tanimë neni 7, i cili përtej asociacionit dhe komunave me shumicë serbe, po flet në mënyrë decidive për një etnitet, vetëm për komunitetin serb. Madje po shkon përtej asociacionit sepse po e krijon një linjë të veçantë të komunikimit me qeverinë që po nënkupton një nivel të tretë qeverisjes, sepse përndryshe po t’i përngjante vetëm një organizimi të thjeshtë, nuk duhet ta ketë as këtë linjë të veçantë të komunizmit me qeverinë”, tha ajo.
Ndërsa, Enver Hoxhaj, nga Partia Demokratike e Kosovës, thotë se qeveria duhet të fokusohet në negocimin sa më të favorshëm të planit të zbatimit.
“Në pikëpamjen time thembra e Akilit qëndron në planin e zbatimit. Dhe ne po flasim deri më tash vetëm për parimet e marrëveshjes pa e parë planin e zbatimit dhe do të shohim çka parashihet në plan të zbatimit meqenëse një fjalë inicion prodhon efekte të madhe juridike … Mendoj që zotëri Kurti duhet të ketë një dije e cila është dije funksionale në çështjet e dialogut ose në çështjet ndërshtetërore dhe jo të përdorë dhe të ketë një dije e cila më shumë të shërben për të plotësuar fjalëkryqin”, deklaroi Hoxha.
Por nga mazhoranca thonë se aktualisht në dialog janë duke u munduar të përmirësojnë gabimet që ka bërë opozita në të kaluarën në këtë proces, sa ishte në pushtet.
“E vërtetë është që opozita po flet për shqetësime por, në fakt ne sot jemi këtu pak me pastru bërllokun që e ka lënë opozita, nëse i referohesh PDK-së dhe LDK-së, këto janë pikërisht këto dy subjekte që na kanë pru neve këtu. Ne kemi kaluar nëpër faza, në vitin 2000 kanë qenë njëfarë parimi që nuk janë pranuar se edhe në atë kohë Serbia ka kërkuar statuse të veçanta, etnizim, zajednicë, Gjykatë Kushtetuese etnike, Gjykatë të Apelit etnike, por nuk janë pranuar në vitin 2008. Çka do që nuk kemi pranuar në vitin 2008, baballarët e tonë kushtetues në vitin 2010 deri në vitin 2019 – 20 këta i kanë pranuar. Sot ne jemi duke u munduar me i zhbë problemet që na i kanë lan këta”, u shpreh deputeti i Vetëvendosjes, Armend Muja.
Pas dakordimit rreh planit evropian më 27 shkurt, takimi i radhës mes Kurtit e Vuçiqit pritet të mbahet në Ohër të Maqedonisë së Veriut më 18 mars.
Kronika e gazetarit, Valmir Gallopeni.
