Vullnet Bugaqku nga Instituti Demokratik i Kosovës ka dhënë detaje se pse Serbia do të jetë e përfshirë në rregullimin e statusit juridik të Kishës Ortodokse Serbe në Kosovë.
Sipas tij, një ndër modalitetet se si mundet Kosova ta formalizojë statusin e Kishës Serbe është ta përfshijë atë në Ligjin për Liritë Fetare.
“Palët në këtë rast, nënkupton dy shtete, edhe Serbia edhe Republika e Kosovës do të kenë rol në përfshirjen dhe në zyrtarizimin e statusit të Kishës Ortodokse Serbe. Këtu besoj që do duhej që Kosova ta gjej mënyrën apo modalitetin se si do ta zyrtarizojë apo do ta formalizojë statusin e Kishës Ortodokse Serbe në Kosovë. Kjo mund të bëhet duke e përfshirë në Ligjin për Liritë Fetare, që është në proces të hartimit në Kosovë. Aktualisht nuk kemi një Ligj ende në Kosovë që i regjistron bashkësitë fetare, ose që ua njeh statusin, etnitetin juridik bashkësive fetare në Kosovë, dhe prandaj besoj që Kosova duhet të tentojë që këtë rregullim apo këtë zyrtarizim, këtë formalizim të këtij statusi të Kishës Ortodokse ta regjistrojë ose ta njeh, ta përfshijë në kuadër të ligjit për liritë fetare”, deklaroi ai në “Ditari” në Tëvë 1.
Më 27 shkurt, Kosova dhe Serbia kanë zhvilluar takim në Bruksel, me ç’rast është diskutuar lidhur me propozimin evropian i mbështetur për normalizimin e marrëdhënieve në mes të dyja vendeve.
Sipas nenit 7 të këtij propozimi, palët do të zyrtarizojnë statusin e Kishës Ortodokse Serbe në Kosovë dhe do të ofrojnë nivel të fortë mbrojtjeje për objektet e trashëgimisë fetare dhe kulturore serbe, në përputhje me modelet ekzistuese evropiane. /Teve1.info/
