Ministri grek përgjegjës për rrjetin hekurudhor, Kostas Karamanlis, dha dorëheqjen të mërkurën, pas aksidentit fatal të trenave në Tempi, shkruan Greek Reporter, përcjell teve1.info.
Në deklaratën e tij, Karamanlis, i cili ishte ministër i Infrastrukturës dhe Transportit, vuri në dukje se “e ndjej se është detyra ime [të jap dorëheqjen] dhe ky është një gjest minimal respekti për kujtimin e njerëzve që vdiqën kaq padrejtësisht dhe të marr përgjegjësinë për gabimet e vazhdueshme të Greqisë dhe sistemit politik grek”.
“Është fakt që hekurudhën greke [nga qeveria e mëparshme] e kemi trashëguar në një gjendje të papajtueshme me standardet e shekullit të 21-të”, shtoi ai dhe vazhdoi të thotë se “në këto 3.5 vite bëmë çdo përpjekje për të përmirësuar këtë realitet. Fatkeqësisht, këto përpjekje nuk mjaftuan për të parandaluar një aksident të tillë dhe kjo është shumë e rëndë për të gjithë ne dhe për mua personalisht”.
