Ministria e Punëve të Brendshme ka bërë të ditur se sot do të disbursohen pagat e para sipas Ligjit për Paga në Sektorin Publik, për të gjithë zyrtarët publik.
Megjithatë MpB ka bërë të ditur se bashkë me pagën nuk do të ekzekutohen edhe shtesat.
“Komisionet për përcaktimin e shtesave të parapara me këtë ligj dhe aktet nënligjore që derivojnë prej tij, tashmë janë themeluar dhe janë duke mbledhur të dhënat nga institucionet përkatëse lidhur me zyrtarët që mund/do të përfitojnë këto shtesa, përfshirë këtu komisionet për shtesën për kushte specifike të punës, shtesën për kushte tregu dhe shtesën për ekspertët”, thuhet në njoftimin e MpB-së.
MpB-ja ka njoftuar se shtesat e shkurtit dhe të marsit për të gjithë përfituesit, do të dalin bashkë me pagën e marsit.
“Përkundër punës intensive të komisioneve për përcaktim të shtesave, procesi i mbledhjes së të dhënave dhe finalizimit të listave është duke vazhduar, andaj njoftojmë të gjithë zyrtarët publikë se shtesat e sipërpërmendura për muajin shkurt do të paguhen në mënyrë retroaktive në pagën e muajit mars”.
“Pra, me përfundimin e mbledhjes së të dhënave nga ana e komisioneve dhe finalizimit të listave me zyrtarët që do të përfitojnë këto shtesa, të njëjtët do të marrin bashkë me pagën dhe shtesën e muajit mars edhe shtesën përkatëse për muajin shkurt”, thuhet në njoftim.
